Iepenloftspul Snakkerbuorren spilet takom simmer it komyske drama Camping fol leafde (wurktitel). Raymond Muller hat it stik spesjaal foar Snakkerbuorren skreaun. Earder skreau Raymond foar Snakkerbuorren it bysûndere Nei Man (2022). De regy is kommend jier wer yn hannen fan Brecht Wassenaar.

It ferhaal
Camping fol leafde is in tragy-komysk stik dat him ôfspilet op – hoe kin’t ek oars – in camping. It is in mozaykferhaal wêryn’t ferskate personaazjes mei de leafde wrakselje. In fleurich stik mei serieuze ûndertoanen út it hjoeddeistige libben, lykas kommunikaasje, seksualiteit, dysels wêze, skieding en elkoar besykje te finen wylst elkoars taal net sprekst.

Rollen
Der binne 9 rollen (6 manlju en 3 froulju fan útienrinnende leeftiden). Neist de personaazjes mei tekst, ferbliuwe der ek ferskate oare gasten op de camping. Wy binne dêrom op syk nei spilers foar it ensemble én foar figuraasje.

Audysjes: mear ynformaasje en oanmelden
De audysjes binne op sneon 30 novimber o.s. Wy wurkje yn twa groepen. In groep moarns fan 10.00-13.00 oere en in groep middeis fan 14.00-17.00 oere. Plak fan hanneling is it gebou fan Tryater, Oostersingel 70 yn Ljouwert.
Om rekken mei te hâlden: de foarstellingen binne op woansdei 25 juny (premjêre), freed 27 juny, sneon 28 juny, tiisdei 1 july, tongersdei 3 july, freed 4 july en sneon 5 july 2025 (reservedata: 30 juny, 2, 6, 7 en 8 july). De repetysjes starte yn jannewaris 2025 en binne op woansdeitejûn en sneontemoarn.

Hasto ynteresse om mei te spyljen? Jou dy dan foar 20 novimber op foar de audysjes fia it mailadres info@iepenloftspulsnakkerbuorren.nl. Jou dêrby yn alle gefallen oan: dyn namme, leeftyd, wenplak en telefoannûmer. Nei 20 novimber krigest sa gau as mooglik berjocht fan ús oer it hoe en wat op de dei fan de audysje.

Iepenloftspulkommisje Snakkerbuorren

———–

Folgje Iepenloftspul Snakkerbuorren ek op Facebook en/of Instagram en/of meld dy oan foar ús nijsbrief. Us nijsbrief ferskynt heechút in pear kear jiers op mominten dat der écht wat te fertellen is. Leuk? Folje dan hjirûnder dyn emailadres yn.

Ja, ik meld my oan foar de nijsbrief fan Iepenloftspul Snakkerbuorren: